Республикан лоархӀам бола «Зарница 2.0» яха ловзар хилар
ТӀема-Даьхенцарча гӀулакхех дола «Зарница 2.0» яха ловзар дӀадихьар республике. Из хоам «Сердалога» бир цу гӀулакха хьалхалаттараша. «27 тоаба яр «Хьалхарчар болам» яхача оагӀон ше-ше котъяла гӀерташ «Мужече» яхача спорта кийчон моттиге дӀайихьача яхьашка дакъа лоацаш хиннараш. Тайп-тайпара низ, кхетам, кадай хилар гойташ дола декхараш кхоачашде дезаш бар доакъашхой», - дийцар тха газетага «Хьалхарчар болам» яхача оагӀон болхло волча Налганаькъан Рамзана.
ЗӀамагӀбарий тоабашта юкъе котало ТӀой-Юртарча № 1 йолча ишколо яьккхар; шоллагӀа, кхоалагӀа моттигаш Илдарха-ГӀалий тӀарча № 7, Дола-Коарча № 7 йолча ишколай тоабашта кхаьчар.
Юкъера ханаш ярий оагӀон дешархошта юкъе чемпионаш Дола-Коарча № 7 йолча ишкола дешархоех хилар, шоллагӀча моттиге Илдарха-ГӀалий тӀара гимнази эттар, хӀаьта кхоалагӀча лагӀа тӀа - МагӀалбикера № 2 йола ишкол.
ЙоккхагӀча классашкарча берашта юкъе котало Наьсарерча № 15 йолча ишколо яьккхар, дотув Илдарха-ГӀалий тӀарча № 3 йолча ишкола кхаьчар, кхоалагӀа моттиг Галашкарча № 1 йолча ишкола дешархошта елар. Иштта цу яхьашка дакъа лоацаш хилар республикерча хьехархой колледжа студенташ, Наьсарерча политехнически колледже дешаш бараш. Котбаьннараш даькъала бувц оаха! МоллагӀча хӀаманна духьалъотта шоаш кийча долга хьагойтар оаш, толашагӀбарех шоаш долга хьахьекхар. Баркал хилда дакъа лоацаш мел хиннарашта; къахьегамах, дикача гӀулакхех дизза хилда шун вахар! - аьлар доакъашхошка.
