ГӀалгӀай берашта юкъера жӀакех йола яхь дӀайихьар
ГӀалгӀай мехка берашта юкъера жӀакех йола яхь дӀайихьар. Ше лаьрхӀар кхоачашдара, Магас-Шахьара культуран, спорта, туризма Центро тайп-тайпара ха яьнна бераш гулдир, яхаш, дийцар «Сердало» газетага из моттиг вӀашагӀъеллараша.
«Тренераша Элжаркъанаькъан Мусас, Ӏоахарганаькъан Урусхана яхачох, цу тайпара каст-каста дӀахьош йолча яхьашка берий хьаькъал а сакхетам а дикагӀа дегӀабоагӀа, хӀана аьлча цига уйла е а сатийна вагӀа везаш а хиларах, дикагӀа кертага болх байт цу яхьаша.
«Кердавар» яхача даькъ тӀа кхо моттиг яьккхар. Лакхара моттиг яьккхар Ӏумарахьажанаькъан Ӏумара, шоллагӀъяр яьккхар Юсуфа. КхоалагӀча моттиге хилар Гойганаькъан Мухьаммад.
Говзал лакха йолча жӀакех ловзарашта юкъе, котало яьккхар Горчхананаькъан Сулеймана. ШоллагӀа хилар Эрселганаькъан Анзор, боарза совгӀат кхаьачар Исмейланаькъан Мухьаммада», - аьлар спорта кулгалхочун гӀончас Къоастой Азраила.
