Гӏалгӏай мехка кхоллама яхь хилар СКФО тохкама урхалленашта юкъе
Гӏалгӏайчен столицан культуран дегӏаахара Центра майдан тӏа дӏабихьар РФ Тохкама комитетий иссбахьален балха даькъ тӏара Халкъашта юкъера шоллагӏа бӏал. Цу юкъе дакъа лоацаш бар Даькъастен федеральни куран чуйоагӏача тохкама урхаллений викалаш. Кхетаче йолаш вӏашагӏкхийтар начӏал дола боахама болхлой, цар дезал. Из яхь лаьрхӏа яр Россе СК тоабай кхоллама таронаш совъяхара, культуран ӏадаташ лорадара, моттигашкарча урхаленашта юкъера доттагӏала бувзам чӏоагӏбара.
«Исбахьален балха даькъ тӏара яхь - из начӏалашта юкъера яхь хинна ӏац, из шоайла новкъостал дара, бовзара, хьаллацара йола таро я. Тхона лоархӏаме да, хӏара доакъашхо цигара раьза волаш дӏавахар, сага товр хилар - из а я котало», - аьлар ше яхьа доакъашхошка моаршал хоатташ Гӏалгӏайчен культуран, туризма министра Лаьнанаькъан Залинас.
Яхьаш дӏаяхьар дӏадоладелар 2018 шера, РФ Тохкама комитета кулгалхочо Бастрыкин Александра хьаллоацаш. Карарча шера кхетачене вӏашагӏтехар, «Цхьоагӏонца - вай низ!» яхача юкъарча темо. Дикагӏбарий цӏераш йоахаш, Магасе яхьеваьлар 20 совгӏа доакъашхо, иштта Ставропола, Селий, Нохчий, Къилбаседа Хӏирий, Гӏаьбартой-Балкхарой, Гӏалгӏай кхоллама юкъарлонаш. Пхе даькъах лаьттача балха говзала мах оттабеш яр профессиональный жюри.
