Республикера промышленность дикка тоалуш латт
ХӀама хьадеш йола моттигаш яржара тӀехьа, кхыча мехкашта юкъе таханарча дийнахьа ший йизза моттиг дӀалоацаш я вай республика. Мехкадаь, Паччахьалкхен зарбан болх лелабераша белгалдечох, укх тӀехьарча итт бетта 113%-га кхоачаш айденнад из гӀулакх мехка. Болх дикка тоалуш латтарех я хьамчах, хьийнача хӀамах, аьшках хӀама кхоллар, дахча, иштта кхыбола кхоачам чакхбоаха моттигаш.
«Республикера промышленность тоаяра тӀехьа дикка къахьийгад тӀехьарча шерашка. Болх ца беш сайца лаьтта моттигаш юха къахьега йолаялийтай. КӀалах, аьшках хӀамаш хьаеш йола СКФО хьалхара цхьанкхийтта моттиг йолаялийтай. Цунна чуйолх ООО «АТМ», ООО «РИАК», ЗАО «РИАЛ» яха къахьегама тоабаш.
Тайп-тайпара арахьара 10 моттиг хьакхийттай цох таханарча дийнахьа», - белгалдир Мехкадас Келаматанаькъан Махьмуд-Ӏаьлас. Цул совгӀа, турбаш хьаеш йола завод, иштта кхыйола мехкара промышленность айеш йола моттигаш я республике болх беш.
«Карарча хана цу оагӀонцара хьал дикка тоалуш латт вай мехка. ДӀахойодача хана а цу оагӀонцара болх тоабеш къахьегаргда вай», - аьлар мехка кулгалхочо.
