Гӏалгӏай мехка дика хьалаш хьакхолл бизнес лелаяра
Гӏалгӏайчен Кулгалхой лаьрхӏа ба бизнес лелаяра дика хьалаш хьакхолла. Республикан ӏаьдал хьож арахьара ахча юкъе а ца доаккхаш, чура таронаш дӏайохийташ йола бизнес дегӏайоалае, массане а цхьатарра бокъонаш хургйолаш, цунца цхьана балха моттигаш хьаеллаш. Цу даькъ тӏа лоархӏаме да бюрократе мухь царна тӏерабаккхар. Цу хаттарех йолча республикан тоабо кийчъяьй лаьрххӏа йола проект, цо таро лу, электросетех технологически дӏахоттавалара ха шозза кӏезигагӏа йоае - 155 денгара 87 денга кхаччалца. Сиха болх беш бола керда гӏирс дӏаболабе лаьрхӏад ер шу чакхдалале.
«Цу тайпара толам баккхара эшар да, электросетий из гӏишло хьалъяра лаьтта кийчдар, из электричествох дӏахоттара йолаш йолча таронашка хьажар. Хила тарлуш дола хувцамаш дара, из хаттар чудоагӏача тайп-тайпарча боахамашка цу каьхаташца дувзаденнарашка хьажа везаш хул. Хӏанз из хаттар кхоачашдар ше-ший аргӏагӏа дӏадахьа лаьрхӏад, из бахьан долаш ха дукха дӏайода. Предпринимателий, электричествох дӏахоттара ханаш ӏаткъаш я къахьегама овсарле дӏайолаяра, инвестице проект дӏайолаяра. Уж хаттараш сихагӏа кхоачашдарах тийша да, бизнес лелаяра хьалаш дикагӏа довзар, цунца цхьана керда предприятеш дегӏайоалаяра наькъ тӏа хьовзамаш а кӏезигагӏа хургда, - аьлар ший телеграм-канала тӏа Гӏалгӏайчен Кулгалхочо Келаматанаькъан Махьмуд-Ӏаьлас.
Республикан Кулгалхочо белгалдир индустриальни, ахархой комплексий, хӏама чакхдаккхара промышленноста, кхыча даькъ тӏара хьал дегӏадоаладара республикан йоккхий таронаш хилар. Цо яхачох, кулгалхой керттера маӏанс - кӏезиг-кӏезиг йоахаш хьалхашкара новкъарленаш дӏаяхар, бизнес дикагӏа дегӏайоалаяр.
Административни духьаленаш лаьгӏъяра проект Гӏалгӏайче хьакхеллар «Кулгалдара говзал: моттигашкара тоабаш дегӏайоалаяр» яхача федеральни программах, из хьаллоац Президентски академе. Балха тоаба вӏашагӏъеллар республикан, Паччахьалкхен, Росреестра моттигерча Урхаллен, моттигерча администрацей, «Ингушэнерго» филиала болхлоех. Кхелахой комиссе балха толам гойтар республикерча Росреестра Урхаллен кулгалхочо Борисов Андрея. Цун доклад ешаш боккхача безамца ладийгӏар балха новкъосташа, кхыча моттигашкарча говзанчаша.
Келаматанаькъан Махьмуд-Ӏаьлас баркал аьлар Борисов Андрейна, цун ерригача тоаба, из дика гӏулакх хьакхолларах, цо белгалдир, цу тайпарча проекташка керттера дакъа дӏалоацаш хул боахамашта юкъе бувзам хилар, тӏеххьара чаккхе гуш хилар.
