«Тӏаргим» яха Ерригача Россе кхетаче дӏахьоргья мехка
Ерригача Россе «Тӏаргим» яхача кхетачено ший болх дӏаболабир вай мехка. Россе 40 моттигера 150 доакъашхо ва цун юкъе дакъа лоацаш. Кхетачен программан юкъе да гойтама балхаш, дешара оагӏув, федеральни говзанчашцара кхетаченеш. Кагирхой дика, беркате хургйола проекташ йоаржае, иштта регионашта юкъера бувзам чӏоагӏбе аьттув хургболаш къахьегаш ба мехка.
«18 шу хьалха «Тӏаргим» моттигерча кагирхой кхетаче санна дӏайолаелар, хӏаьта тахан Къилбаседа Кавказа эггара чӏоагӏагӏа цӏихеза йола кхетаче хиннай цох. Къаьстта теркалде деза из тахан, Россе Президента Путин Владимира ер шу Россе къамий цхьоагӏон Шу да аьнна кхайкадарца. Тайп-тайпарча къамий, ӏадатий, культурай нах ба вай мехка тахан гулбеннараш. Царех хӏаравар боккхача мехка кхоанен хӏама тоадара, керда наькъаш хьаделлара, беркате гӏулакхаш доаржадара тӏехьа къахьега кийча ва. Шин оагӏонца болх дӏахьош хургья кхетаче укх шера. «Россе къамий цхьанкхетар» яхача оагӏонца; къамашта юкъера барт, бувзам чӏоагӏбеш хургба тахан. «Хӏама лохаш, гӏо деш йола тоаба» яхача оагӏонца къонача гӏо деш леларашта хьехаргда наха новкъостал дар мишта хила деза», - язду ший Телеграм-канале вай мехкадас Келаматанаькъан Махьмуд-ӏаьлас.
Кхетачен доакъашхоша цхьана мехка пайда беш хургйола проекташ хьакхолларгья. Иштта викалашта кийчъяь культурацара, спортацара вӏашагӏкхетараш хургда цига. Вай мехкара хоза ӏалам, лоаме йовзаргья хьаьшашта. Экскурсен юкъе да Тӏаргимерча чукхийттача моттигага хьажар, Лохера Пхьуй яхача гӏалай юрта бахар.
