Къаман проекташ йоаржаяра лакха тӏахьожам беш ба мехка
Къаман проекташта лаьрхӏа федеральни оагӏоно хьахьожадаьча рузкъага гӏолла, болх дӏахьош ба тахан мехка. 5,4 млрд сомага кхоачаш долча ахчах 3,5 млрд сом ахча балха юкъе дӏадахийта баьннаб мехка (62%). Цул совгӏа, бархӏ проектах пхе проектацара болх Россе юкъерча боарамал лакхагӏа латт вай республике.
«Хӏара дийнахьара къахьегам ба цу дерригнена хьалха латтар. Иззал проекташ йоаржаеш хилча; дагадахка, геттара фийла хила везараш дукха хул. Цу юкъе да рузкъа ца таа тарлуш хилар, болх йиллача хана чакхцабоалаш бисар, иштта кхыдараш а. Керттердар - уж деррига хӏамаш ханнахьа гучадахар, кхоачамбоацараш хургдоацаш къахьегар.
Республикерча хьакимаша федеральни оагӏонца хӏара денна бувзам лоаттабеш, лакха терко еш дӏахьош болх ба из. Къаман проектий хӏама тӏехдика кхоачашдеш, рузкъа кходеш, хила тарлуш долча кхоачамбоацарий ханнахьа уйла еш, хила деза. «АРМ Риски» яхача оагӏонца 2025-2026-ча шерашка 483-зза нийсдала тарлуш хиннараш юстардаьхад. Цу оагӏонцара болх дӏабахьара гӏулакх тахан Россе моттигашта юкъе 6-ча мугӏар тӏа латт вай мехка. Цул совгӏа, укх тӏехьарча шин шера Россе Паччахьалкхено, РФ Паччахьалкхен Аналитически моттига тӏадилла 500 дехар а декхар а кхоачашдеча оагӏонцара болх дӏабихьаб республике», - белгалдир вай Мехкадас.
Республикан кулгалхочо теркалдир, къаман проекташцара болх лерттӏа чакхбаккхар, из деррига бахархошта паргӏато еш хилар мехкарча хьакимашта хьалхашка латтача декхарашта юкъе керттера моттиг дӏалоацаш долга. Цу гӏулакха йоккха терко еш ба мехка. РФ Паччахьалкхен аналитически оагӏонца белгалдаьраш кхоачашдеш, моттигерча министерствоша, федеральни моттигашца цхьана, укх шера ялх лоархӏамеча проекта болх чакхбаьккхаб.
Къаьстта йоккха терко еш ба мехка, проектий болх юххьанца йиллача хана чакхбалийтара, цхьаккха кхоачамбоацар нийслургдоацаш. Паччахьалкхен программаш йоаржаяр тӏехдика хургдолаш тӏахьожам чӏоагӏбеш, хӏара оагӏон хьал тохкаш, нийсдала тарлуш долча хьаштдоацарий ханнахьа уйла еш ба мехка.
