Хоржамаш долча дийнахьа, ГӀалгӀай мехка цхьа эзар кхо бӀаь тӀахьожамхо хургва
Кхадж тоссача дийнахьа, массадолча хоржамий даькъош тӀа хила тарлуш ва 1,3 эзар тӀахьожамхо, уж ба Российски Федераце президенталла кандидаташта тӀехьа кхадж мишта тосс зувргдола политически партера, иштта Россе, ГӀалгӀайчен хӀарман палатера а нах, яхаш, дийцар «Сердало» газетага ГӀалгӀай Республикан зарбан болх лелабераша.
«Карарча хана, Россе Президент хоржаш дӀахьош дола хоржамаш чӀоагӀа лоархӀаме да берригача мехка. Цох тийша да вай мехкара хьал дӀахо дӀадахар, паччахьалкхе дегӀаяр», - аьлар ГӀалгӀай Республикан Кулгалхочо Келаматанаькъан Махьмуд-Ӏаьлас, ше мехка хоржамаш дӀадахьара кийча хила безарах дувцаш.
«Вай хьал аттачарех дац. США а цунца барт баь лелача паччахьалкхенаш а шоашта могар ду; вай мохк бохабе, цун низ эшабе гӀерташ. Росси массаза а хиннай политически даькъ тӀа лоархӀаме дакъа дӀалоацаш, массаза хиннай низ болаш а лоархӀаме а. Иштта хила деза вай дӀахо а», - аьлар Макшарипа Махьмуд-Ӏаьлас.
Карарча хана, избирком ийс доазон тӀа, 142 хоржамий даькъ тӀа кийчо еш я, хоржамаш дӀахьоча дийнахьа кхадж тасса хьабоагӀача наха дикагӀа дола хьалаш хилийтара. Керттера болх йистебаьннаб ала йиш йолаш ба, 30 эзар совгӀа болча хоржамхоех дола хоамаш нийса а да.
Цхьа эзар ах эзар совгӀа болча волонтёраша новкъостал дергда, ГӀалгӀай мехка кхадж тасса безарашта, могашал йоацаш, кхадж тоссача моттиге хьабахка йиш йоацаш, цамогаш болча наха.
