ЦхьоалагӀча группан заӀапхочуни цун дезалеи бокъонаш меттаоттайир
ГӏалгӀайчен сага бокъонех волча викала аппарате кхайкарал лоткъам бера цхьоалагӀча группан заӀапхочун фусам-наьнагара. Кхалсаг латкъаш яр, укх массехк шера ший дезала нийслуш йолча халонашта. Инсульт хинначул тӀехьагӀа, цун цӀен-да вордингашца мара лелалуш вац, даим цунга саг хьажа везаш а ва. Цунга хьожаш хиларах доагӀаш дола пенси, дӀадахача шера денз, хьалуш дац. Мел эшаш дола каьхаташ дӀаделча а, из хьал меттагӏ доалаш дац.
«Из гӀулакх дайзачул тӀехьагӀа, сага бокъонех волча викала лаьрххӀа дола хаттар дахьийтар Россе вахара ганзе, массайолча оагӀорахьара из хьал тахкар дехаш. Из болх тохкаш белгалдир, бе йиш а йолаш, болх беш воацача сага, хьалхарча группан заӀапхочоа тӀехьахьожаш хиларах дола ахча юххьанца денз хьожадаь цахилар.
Цун бахьан дар, лаьрххӀача хоамий ганзага из чӀоагӀдеш дола, цу кхалсага цӀен-даь цхьоалагӀа группа заӀапхо хилар чӀоагӀдеш дола каьхаташ цахилар. Цига эшаш дола каьхаташ дӀадихьачул тӀехьагӀа, хьалхагӀа баь хинна соцам хийцар.
СФР лаьрхӀар, законах боагӀаш бола борам а болаш, цу кхалсага пенси хьожаде. Иштта из соцадаь лаьттача хана доагӀаш мел дар а цу юкъедихьар», - аьлар «Сердало» газетага ГӏалгӀай Республикан УПЧ хоамий-аналитически даькъ тӀа.
Цу тайпара, сага бокъонех вола викал юкъеварах, цхьоалагӀча группан заӀапхочун, цун дезала бокъонаш меттаоттайир.
