Наькъ тӏа хиннача доккхача хатарца дувзаденна гӏулакх хьадийллар ӏаьдало
Ши саг леш, хиннача доккхача хатара бехке волчун духьала гӏулакх хьадийллар Наьсарерча МВД болхлоша. Из хоам «Сердалога» бир цу моттигера.
«Тохкама болхлоша белгалдечох, укх бетта 17-ча дийнахьа, кхоалагӏчох ах сахьат даьнна ха йолча хана, Наьсарерча Тӏонганаькъан цӏерах болча ураме 1984-ча шерарча Магӏалбикерча вахархочо, каьхаташ доацаш ше лоаллаш хинна нанас хьаенна «Тойота Ландкрузер 100» машин, харцача оагӏон тӏа ваьнна, духьалйоагӏача «Митсубиси Пикап» машина тӏатехар. Хӏаьта из машин сов чӏоагӏа юстаркхоссарах шийна тӏехьа йоагӏача «Тойота Камрех» кхийттай.
«Митсубиси» лоаллаш ваьгӏар, цунца хинна кхалсаг Наьсарерча дарбанче кхелхар, царца хинна цхьаькха кхалсаги, «Тойота» лоаллаш ваьгӏари реанимаце ба», - йоах МВД беча хоамо. Машинаш Россе ОМВД гӏод тохача моттиге латт. Цу унзарча хатаро шин сага вахар хоададир, ши саг геттара хала ва.
Наькъашка латтача полице болхлоша даггара дӏадувцаш латташ да; лоралуш, наькъашкара бокъонаш лоархӏаш хила, яхаш. Доккхача хатара юкъеболх гонахьа мел хиннараш, боккъал а ма толхаде шоай, наьха вахар, фийла хила, шортагӏа лела!
