Лораша кӏалхарваьккхар шозлагӏа инсульт хинна 104 шу даьнна вахархо
Гӏалгӏай лораша 104 шу даьнна воккха саг шозлагӏа инсульт хинначара кӏалхарваьккхар. Из сиха воалавир Гӏалгӏайчен республикански Ӏоахашканаькъан А.О. цӏерагӏча клинически дарбанчен миай центре. Хьал аттачарех дацар - нийсса пхи шу хьалха цунна инсульт хиннадар. Цул совгӏа, цун юкъара могашал кхы а дукха лазараш хиларах чоалхане яр.
«Сердало» газетага Гӏалгӏайчен лорий министерствос ма аллара, миай центра лораша сиха магнитно-резонанса томографи яьккхар цунна, цо хьагойтар керта чу дукха цӏий дӏаийна, човнаш яь хилар. Лораша из сиха реанимаце ӏовиллар, ден-бус цунга хьожаш, дарба дӏадоладир.
Дика дарба дарах из саг меттавоалавир, цул тӏехьагӏа миай неврологе даькъ тӏа дӏавигар. Укхаза дукхача лораша шо-шоай оагӏорахьа дарба деш из тоавир. Тахан 104 шу даьнна къоано, дика могаш волаш, ший цӏагӏа ва.
