ВӀаштехьа доацача хьале долча берий видеоролико корзагӀдаьккхад адам
Ишколай кулгалхошца кхетаче дӀайихьар дешареи Ӏилмани гӀулакхех йолча министерствон хьалхалаттача Цхьорой Ахьмад-Башира. ВӀашагӀкхетара бахьан- интернете гӀолла лела, наркотикаша шоай лоӀамера даьхача санна хеталу бераш гойта ролик. Массанахьа дӀа-хьа тувсаш, лелача цо сатем боабаьб хьехархой, даьй, ноаной, республикерча Ӏаьдала. Из хоам «Сердалога» бир дешареи Ӏилмани гӀулакхех йолча министерствос.
«Кхетаче дакъа лоацаш бар министерствон кулгалхочун гӀонча вола ГӀазданаькъан ИбрахӀим, республикера керттера нарколог Ваделанаькъан Джамбулат, берий бокъонех йола викал Чахкенаькъан Зарема. ХӀаране шийна хетар, дича бакъахьа дар аьлар цига. Цхьорой Ахьмад-Башира белгалдир, берашта лакха тӀахьожам лоаттабе безилга, даьша, ноаноша шоай дезал лела моттигаш теркалъе езилга, даиман фийла хила безилга», - дийцар тха газетага.
Кхетаче лаьрхӀар, ишколашка наркотикашта духьалара низ чӀоагӀбеш йола программа дӀакхахьа езилга, цу балха лакха терко лоаттаеш. «Видео тӀара бераш малашд, мичахьара да тохкаш ба тахан. Цу гӀулакха боаггӀаш бола болх дӀахьоргба Ӏаьдало», - дийцар ер хоам баьраша.
