Дикагӏа дола модз, хьовла хоржаргда вай мехка
Тов бетта 26-ча дийнахьа «Барта гӏала» оалача музее вай мехкарча кхачан чам бовзийташ йола йоккха фестиваль-яхь дӏахьоргья. «Дикагӏа дола гӏалгӏай модз», «Дикагӏа дола гӏалгӏай хьовла» яхача шин оагӏонца хоржам беш хургба мехкахой цу дийнахьа.
Яхьашка тӏахьожаш, хоржам беш хургбарашта ший кхача бовзийта йиш йолаш ва моллагӏа саг: фермерски боахама викал, нокхарий леладер, ресторана болхло, бизнесмен, иштта лакха говзал йола кхалнах. Яхьашка дакъа лаца ловш волча сага пхе тайпара модз, иштта жуврах, хьоарах даь шин тайпара хьовла кийчде деза. Кхачан хьал теркалдераш деррига хӏама зувш хургба цу дийнахьа. Иштта кхачах чам баккха йиш йолаш ярмарка а хургья цига.
Яхьа кхело котбаьннараш къоастабеш болх дӏахьоргба. Нийсса кхо сахьат даьлча, белгалбергба кхача эггара чаме хиннараш. «Сердалога» из хоам мехкарча Паччахьалкхера кхаьчар. «Эггара дикагӏа дола модз» яхача оагӏонца хьалхара моттиг яьккхачунна 15 эзар сом ахча лургда, шоллагӏа моттиг яьккхачунна - 10 эзар сом, хӏаьта кхоалагӏа моттиг яьккхачунна – 5 эзар сом.
Эггара чам болашагӏа дола хьовла хьадаьчунна 5 эзар сом лургда, шоллагӏча моттиге эттачоа - 3 эзар сом, кхоалагӏа моттиг яьккхачунна - 2 эзар сом. Чама эггара беркатегӏа дола модз арадаккха деза, еррига говзал тӏайохийташ кӏаьда, дерригача доазон тӏа мел вар каравугаш хоза хьадж йоаржаю хьовла де отта веза ха я хьаэттар. Дакъа лацар мах боацаш да. Тов бетта 25-гӏа ди хьаотталца чудала йиш я дехар, дакъа лаца ловчо укх адресах: stadӏonmagas@maӏl.ru. телефон: 8 962 642 82 82.
