ГӏалгӀай мехка арахецаргда, Коталон 80 шу дизара хетадаь ахча
24.03.2025 15:58
Коталон 80 шу дизара ха тӀакхоачаш, вай республико арахецаргда дезача денна хетадаь аьшка ахча. Цун дукхал 1000 хургда, яхаш, дийцар мехка Кулгалхочо.
Бакъахьарча оагӀорахьа хургья Коталон орден, иштта йоазош: «СИЙЛАХЬЧА КОТАЛОН 80 ШУ. 1945-2025», вокх оагӀон тӀа хургья МагӀалбика герб, йоазув «ТӀЕМА СИЙЛЕН ШАХЬАР МАГӀАЛБИК». Хӏара ахча пластиках баьча бетта чу доалларгда, ботт папка чу боалларгба, тӀема сийлен Шахьар хиларах тарра МагӀалбиках болча хоамаца.
ГӏалгӀайчен Кулгалхочо Келаматанаькъан Махьмуд-Ӏаьлас белгалдир, из ахча лоархӀаме хургда тӀема шераш дага мел доагӀарашта, тӀем тӀа латаш е къахьегаш хиннарашта.
