РФ гӀишлон министерствос оттабаьча маьхага хьежача, из тахан 48 676 сом ба. «ХьалхагӀа, говзанчаша оттабаьча маьхах, 2023 шера тов бетта маьха чухьнахьа яр ГӀалгӀайчера квартираш. Цу хана, республикан керда квартираш хьалъеш латтача моттиге, квадратни метра мах бар 53,2 эзар сом, нах баьхача, къаьнарча квартирех - 26 эзар сом. Юкъера рыночни оала мах 2023 шера хьалхарча кхаь бетта 45 805 сом бар», - аьлар «Сердало» газетага.

Белгалду, цу хьокхамга хьежжа хул социальни хьаллацара деш дола новкъостал а: социальни оалаш дола ахча, субсидешта, цкъара эцаш дола ахча цунга хьежжа лу.

Квартирашца дувзаденна дош регионашка эггара лоархӀамегӀа да. Дукха ха йоацаш, «Сердало» газета корреспондента белгалдаьдар, ГӀалгӀайчен столице Магасе шин цӀенах латташ йола квартира эцара юкъера вахара таро йолаш бахача наха 13 шу деза, аьнна.