Топ теха кхалсаг лозаяь зуламхо, лаьцар Ӏаьдала болхлоша
18.03.2024 11:43
ЦӀаьхха, даьннача довна юкъе топ теха кхалсаг лозаяь 17 шу даьнна зуламхо лаьцар, Илдарха-ГӀалий тӀара. Из хоам «Сердало» газетага бир МВД болхлоша.
«ДӀабихьача тохкама балхо гучадаьккхачох, укх бетта 16-ча дийнахьа, цӀаьхха, ийккхача довна юкъе 24 шу даьннача кхалсага топ техай 17 шу даьннача зӀамигача сага.
Илдарха-ГӀалий тӀарча Полевой яхача урам тӀа хиннад из зулам. Герзо ког лозабаь кхалсаг дарбанче Ӏочуйигай», - йоах тхогарча хоамо. Из гӀулакх тохкаш ба Ӏаьдала болхлой.
