ӏарпенаькъан Ювсапа цӏи лелаю Гӏалгӏайчен Политехнически колледж тоаяь яьлар
Наьсаре тоаяь яьлар ӏарпенаькъан Ювсапа цӏерах йола Политехнически колледж, из хьакхеллача хана денз, хӏанз хьалхара цӏенхаштта тоайир из. Цун проект кхоачашйир Гӏалгӏайчен гӏишлошъяра Министерствос дехарах, «Профессионалитет» яхача федеральни программо, «Кагирхой, бераш» яхача къаман кердача проекта чуйоагӏаш. Уж проекташ хьаллоац Россе президента Путин Владимира. Из болх дӏахьош дӏадодар 123 миллион сом дар.
«Сердало» газетага, Гӏалгӏайчен гӏишлошъяра министерстве ма аллара, гӏишлонхоша хийцар тховнаш, тока хьал, керда йӏовхала гӏирсаш оттадир, тӏера гӏишло хоза куц долаш тоайир. Из беррига болх тӏахьожам болаш дӏабихьар, цига каст-каста балхага хьожаш яр гӏишлошъяра министерство.
Из республикан боккха лерхӏам болаш да, хӏана аьлча цу колледжо кийчбу тахан Гӏалгӏайчен транспорта, мехкадаьтта даькъ тӏа эшаш бола говзанчаш.
