Таханарча денга кхоачаш, 64 000 бер е 88% бераш маьхий теха да, цо таро хулийт берашта лазар ца кхетийта, эшаш йола могашал берашта юкъе лоаттае. Цунах дийцар Сластенин Владимира кулгал деш дӀайихьача паччахьалкхен кхетаче, иштта цига дакъа лоацаш яр ГӀалгӀай Республикан унахцӀенон министра декхараш кхоачашдеш йола Антошканаькъан Зарема. «УнахцӀено лораеш дола маьхий тохара къаман календарага хьежжа, берашта маьхий тохара болх дӀахо дӀахьоргба», — аьлар республикан унахцӀенон кулгалхочо.