«Магас-Казань» яха керда авиарейс хьайийллай мехка
Вайцигара Татарстане аха йиш йолаш ба хӀанз бахархой. «ЮВТ Аэро» авиакомпане беча хоамах, «Магас», «Казань» аэропорташ хотташ йола керда рейс кхеллай тахан. Укх шерарча ардара бетта 7-ча дийнахьа хургья хьалхара рейс.
ХӀара кӀиран шинарча дийнахьа вайцигара Татарстане ухаргда фецара кема. Казанера фецара кема айлуш дола ха – 8:25, Магасера цига юхайодаш йола рейс - 12:10. Регионашта юкъера бувзам хьаллоацаш болча бизнесменашта, туристашта, иштта кхыбарашта дика аьттув ба из», - дийцар «Сердало» газетага. «Магас» яха аэропорт ший болх дикка шербеш я.
2024-ча шерара хьал теркалдича, цунга гӀолла чакхваьннараш 157 эзар совгӀа саг ва. Цо хьагойт цигара болх дикка баржаш латтилга.
Таханарча дийнахьа «Магас» аэропортера рейсаш я Москве, Санкт-Петербурге, Соче, Самаре, Тюмене, Петрозаводске. Иштта хьажол тӀерадаккха болхарашта лаьрхӀа Саудовски Аравера рейсаш.
ДӀахо дӀайодача хана, кхы а дикагӀа из болх шербе, керда рейсаш юкъейоале лаьрхӀа ба аэропорте. «Магас - Казань» яха керда рейс Россе кхыйолча моттигашцара бувзам чӀоагӀбеш дола гӀулакх да.
