«Тӏаргим» яхача кхетаче вай мехка кхаьчараш, Россе 40 совгӏа моттигера викалаш ба
«Тӏаргим-2026» яхача Ерригача Россе кагирхой кхетачено вай мехка гулбир Россе 40 совгӏа йолча моттигера керда наькъаш хьаделлара тӏехьа къахьега ловш бола къонабараш. Укх бетта 8-ча денга кхаччалца дӏахьоргба цар шоай болх. Къонабарий аьттув ба мехка пайдане хургйола, лоархӏаме моттиг дӏалоацаргйола проекташ йоаржае. «Сердалога» бенача хоамах, кхетаченна хьалхалаттараш болх боаггӏача боараме дӏагӏоргболаш къахьегаш, деррига кийчдеш ба.
«Тӏаргим-2026» яхача гулламе дукха хӏама довза, ӏомаде, пайдане хургда аьнна хетараш дӏа-хьа эца, тоабанца болх барца лакхаленашка кхача аьттув ба къонабарий. Массехк тематически оагӏонна бийкъаб болх. Федеральни говзанчашца, политологашца, бизнес-тренерашца, иштта кхыбарашца лекцеш, гойтама балхаш хургда гулбеннарий. Мехкий, иштта экологен, туризма, таьрахьашца дувзаденнарий хӏама тоадергдола проекташ йовзийташ, хьалхара гӏа боаккхаргба хьинареча къонабараша. Тоабанца тайп-тайпара болх дӏахьош хургба уж хӏара денна. Хӏаьта къаьстта лоархӏаме моттиг дӏалоацаш да доакъашхошта вай истори, культура, лоаман хоза моттигаш, беркате ӏалам, эздий ӏадаташ довзар.
Экскурсей программага гӏолла цӏихезача гӏалай юрташка кхача, тхьоврарча хана лаьтта ӏадаташ довза, вай къаман даарех чам баккха, хьаьша тӏаэцар вай мехка мишта латт бӏаргаго аьттув хургба Россе тайп-тайпарча миӏингашкарча наьха. Моттигашта юкъера бувзам, барт чӏоагӏбеш я «Тӏаргим» аьлча, харцахьа хургдац тахан. Йоккхача Россе бахача къонабарашта керда, беркате наькъаш хьаделла, шоашта пайдане хургда аьнна хетар массанена дӏадовзийта гӏо деш моттиг я из тахан.
