«Иштта из дувзаденна да, кIа гулдара автоматизацеца: из чакхдаккхара, лорадара, дIа-юха дахьара, маьхал даккхара, кIа юхакъоастадара, дIадаккхара, иштта кIина продукташ чакхъяхара, чура а рыночни а балхаш дIадахьара, паччахьалкхен фонде из хьаэцара бола болх- лерттIа вIашагIбелла хургболаш.

Из доацаш а, российски бизнеса таро лу цу дешо, кIина рынке болх къаьгга дIабахьа, хIаьта паччахьалкхенна-регионашка кхачана кIерамзлен Iалашо яра бола болх боаггIача боарам тIа лоаттабой хьожаш тIахьожам бе», — аьлар республика юртбоахама министерстве.

Цунца дувзаденна, йоагIаш йолча структурай болхлой цхьа группа хьа а яь, кхетаче дIахьо республика аграрешца, царна хьалха а доккхаш кердача системо болх мишта бу.

Тахан цу тайпара кхетаче дIайихьар, Шолжа района ГIажара-Юрта: юртбоахама министра гIончас, Келиганаькъан Илеза, республика Центра кулгалхочо Ховтанаькъан Елизаветас, ГIалгIай Республика АККОР кулгалхочун декхараш кхоачашдеш волча ГIоандалой Азраьила, Россе юртбоахама министерства «Центр агроаналитики» ФГБУ гIалгIай филиала кулгалхочо Шоанахой Хьавас.

Кастлуш, говзанчаш баха лаьрхIа ба: Назрановски, ДжIайрахьа районашка. Кердадараш, шоай ханнахьа, дIакхачийта дезаш да масса болча аграрешка.