«ГIалгIайче, «ДегIаахар» яха къаман проект кхоачашъеш, керда гIишлош хьалъеш латт, ха яхача боккхийча наха, заIапхошта дикагIа стационарни гIулакх дара лаьрхIа. Цу тайпара моттиг я МагIалбик шахьаре, иштта унахцIенон керттера «Ветераний цIа» хьалдеш да Наьсарен кхалерча Сурхо тIа», — аьлар ГIалгIай Республикан къахьегама министерстве.

«Ветераний цIен» материальни таронаш хувцалургья керда гIишло хьалъярца, хIана аьлча наха дарба де а салаIа а моттигаш тIакхетаргья. Цунга хьежжа лораш а кхыбола болхлой а цу чу болх бе йиш йолаш хургба. Из гIишло хьалъяь йоаккхаргья хьатIадоагIача шера.

ГIалгIай Республикан кулгалхочо Келаматанаькъан Махьмуд-Iаьлас яхачох, цу тайпара керда гIишлош хьалъяро дукха декхараш кхоачашде таро хулийт; къаьстта боккхийча наьха, заIапхой могашал тоаяра ца хилча даргдоацар да из. Цу моттигашка царна эшаш йола терко лоаттаергья.

«Белгалдаккха деза, вахаре наха новкъостал дара наькъ тIа тахан карагӀдаьннар кIезига дац: дIадахача шера 32 эзар гаргга дезала пособеш деннад 8 шергара17 шерга кхаччалца ха яьннарашта, иштта 30 дезал гаргга берий пособеш хьаийцараш ба 3 шергара 7 шерга кхаччалца ха яьннараш, дIахо 9 эзар совгIа дезала бер малхадаларах луш дола ахча деннад. Кулгалхой оагIорахьара доккха новкъостал лоаттадеш хиларах, 2023 шера республике таро йоацарашта новкъостал де вIаштIехьа доал», — аьлар Махьмуд-Iаьлас, карарча хана беш бола болх белгалбеш.

Мехка ший аргIагIа дIахьош ба хьал-таро тоаяра болх. ХIара керда гIишло хьалъярца, моттигаш дукхагIа хулаш йоагIа, дукхача шерашка къахьегаш хьабоагIача наха салаIа моттигаш тIакхет.

ГIалгIай Республикан Кулгалхочо белагалдир, керда гIишло болх бе йолаяларца, цу наха лаьрхIа 130 моттиг хургья, аьнна. Вахарца дувзаденнача дешай терко яра, унахцIено тоаяра, наьха хьалаш Iалашдара болх дIахо а дIахьоргба, тахан латтача хано керттера дIадехаш дар из долга кхета а деш.