«2023 шера ГIалгIайче кхоачашъергья «Юртара наькъаш тоадар» яха программа, хьатIайоагIача хана из болх бекъаргба кхаь даькъа. Уж балхаш дIадахьара 2023 шера паччахьалкхено хьахьожаде лерхIаш да 627,1 млн сом, федеральни бюджетера хьадайташ дар — 620,9 млн сом да», — аьлар министра.

Цо хоам бир Махьмуд-Iаьлага, 2023 шера наькъаш тоаде лерхIаш, шин дезала фусамашца дувзаденна сертификаташ дала лерхIаш хиларах, иштта дукха нах тIалатта моттигаш тоаергхилар а белгалдир цо. ДукхагIдола ахча хьожадергда наькъашца ювзаенна йиъ моттиг хьалъе, из да 613,8 млн сом.

Цу тайпара, ГIалгIайчен наькъаш эргадоахаргда; «Южни» оалача оалхазараш леладеча комплекса тIабода никъ Iобуллаш, «ЧIасанаькъан» ахархой — фермерий боахама (КФХ), «Наьсаре-Шолжа-ГIалан», «Къулбехье-Агро» боахама (СПК), Вежарий-Юртарча берий беша, №10 йолча ишкола тIадолха наькъаш Iодехкаш.

Цул совгIа, шин дезала вахара хьалаш тоадара, уж дакъа лоацаш ба беча балха юкъе, 125 кв. м. хургйола вахара гIишло хьалъеш, царна новкъостал де лаьрхIад. Цу гIулакхага 3,5 млн сом дIагIоргда. Иштта юрташкара дукха нах сувца моттигаш тоаяра 9,9 млн сом хьожаду.

«Вай юрташ а шахьараш санна дегIайоалае еза, из лоархIаме да. Юрташка бахаш бараш ба боккъонца бола ахархой, кхаш а хьайбаш а леладераш.

Цар кIезига дакъа юкъедахьац, вай республикан юртбоахам а экономика а дегIайоалаяра. Уж нах, теркал ца беш, бита йиш яц, уж хьаллаца беза, цига эшаш дар дIа а дохийташ», — аьлар Махьмуд-Iаьлас.

ГIалгIай Республикан кулгалхочо иштта белгалдир, вай цхьайолча юрташка паччахьалкхен программа кхоачашъеш даьха толамаш хилар а.

Уж дувзаднна дар юртахой вахара хьалаш тоадарца, иштта моттигерча Iаьдало доал деча даькъ тIа инженерни, вахара эша кхыйола таронаш хьаярца.