Полковника Кхоартой Джабраила сийленг хьадийллар Калининграде
Турпал хиннача вай мехкахочоа, Кхоартой Джабраила сийленг хьадийллар Калининграде. Из хоам «Сердалога» бир мехкарча Миннаце.
«Йоккха Исаково оалача юртарча Турпалий аллее тӏема пхи орден хиннача, Кенигсберге хиннача тӏема доакъашхо волаш, майрал гойтача Кхоартой Джабраила лаьрххӏа сийленг оттадир.
Фашист вохавеш лаьттарашта юкъе йизза моттиг дӏалаьца вола вай мехкахо ший лоӏамца тӏем тӏа вахарех вар», - йоах тхога бенача хоамо. 114-ча Нохч-Гӏалгӏай кавалерийски дивизе политоагӏон хьалха латташ, полка штаба кулгал деш хиннав вай къаман майра бӏухо. Сталинграде, Прибалтике, Кенигсберге лаьттача тӏема юкъе хиннав из.
Цун корпуса тохкамхоша 1600 гаргга фашист есарал воалаваь хиннав. Калининградски областерча гӏалгӏай викалашта ловш дар, цун цӏи цу моттигашка чӏоагӏъяр. «Фашист вай лаьтташкара вохавеш лаьттача 20 бӏухочунна юкъе латт тахан Кхоартой полковника цӏи», - белгалдир Калининградски областерча гӏалгӏай НКА хьалха латтача Ваделанаькъан Саламхана.
1981-ча шера хаьдар цун вахара никъ. Вай мехка цун цӏи лелаеш урамаш да, иштта Волгограде йовзаш я деналах визза хиннача бӏухочун цӏи. Сийлахь-боккхача Даьймехка тӏема шерашка хьалха латтараша доаккхал деш, белгалболаш, денал, майрал хиларца цӏихеза хиннаб вай къаман дуккха къонгаш.
Коталонга цакхаьчараш, де доацаш байнараш дукха ба. Цӏаккха а вай бицбе йиш йоаца, тӏехьен бовза беза сийдола, яхь йола къонгаш хиннаб уж.
