ГӀалгӀайчен Илдарха-ГӀалий тӀа техкар, бер дехка хилара гӀулакх
ГӀалгӀайчен Илдарха-ГӀалий тӀа техка даьлар, хӀетта хьадаь бер дехка хилара гӀулакх, яхаш, хоам бу «Сердало» газетага. «ГӀалгӀай Республике гӀолла йолча Россе СК СУ Илдарха-ГӀалий тӀарча викалаша, моттигерча шин яхархочунна духьала хьадийлла хинна, шиъ уголовни гӀулакх техкар. Цу зулама юкъе цар дакъа лаьца хиларга хьежжа, уж бехке бу, саг лочкъа а ваь, российски паччахьалкхен арахьа из дӀавигарах», - аьлар тохкамхоша.
«Тохкама балхо хьагойтачох, 2020 шера, 32 шу даьннача кхалсага, ше биълагӀа бутт болаш дезалхочох кхийнача хана, кхыча кхалсагаца барт баьб, малхадаьнначул тӀехьагӀа бер цунна дӀалургдолаш. ДӀахо ше из бер леладергда аьнна, тӀаийцад шоллагӀча кхалсага. Цул тӀехьагӀа, 2021 шера, 33 шу даьннача, бехке еш йолча кхалсага шийга бер хьакхаьчача, цун каьхаташ а хийца, из Казахстана Республике дӀадигад», - йоах хоамо.
Тохкамхоша боккха болх дӀабихьаб из гӀулакх ма дарра тохкаш, экспертизаш а яьхай, иштта гучадаьлар даь хинна зулам. Уж уголовни гӀулакхаш, хӀанз укх сахьате, судо тохкаш да.
