Илдарха-ГӀалий тӀара моттигаш тоаеш бола укх шерара болх йистебаьлар
2024-ча шера шахьара моттигаш тоаярах йолча паччахьалкхен программага, къаман проектаг гӀолла Илдарха-ГӀала тоаеш дола балхаш йиллача ханал хьалха йистедаьлар. Из хоам «Сердалога» бир шахьара мэре.
Бахархоша онлайн-хоржамашка гӀолла, эггара хьалхачарца юхьанца тоае еза аьнна белгалъяьха моттигаш я тоаяьраш - шоллагӀча зӀамигача кхалера ЦӀечой цӀерах бола 533 метр урам, Дьякова, Мира яха берий беша тӀабодаш бола ши урам. Оттаяьча ханал хьалха йистебаьннаб цигара болх. Асфальт буллаш, керда лампаш йохкаш, гӀандаш, нувхаш Ӏочукхувса яьшкаш оттаеш, тоаяьй уж моттигаш.
«Хоржамашка дакъа лоацаш санна, дӀахьоча балха гӀулакх а лоархӀаме чакхдаьккхар бахархоша. Шоаш бахача моттигах дог лазаш хиларах, боаггӀача боараме дӀадахьа аьттув баьлар деррига», - аьлар шахьара кулгалхоша.
