Илдарха-Гӏалий тӏа хий тоадеш латтача юкъа, машинашца тӏакхухь хий
16.03.2026 09:49
Эбарга-Юртара хий тоадеш латтача юкъа, машинашца хий дӏатӏакхухьаш ба Илдарха-Гӏалий тӏарча бахархошта. Из хоам «Сердалога» бир шахьара мэре зарбан болх лелабеча Мутаӏаланаькъан Мадинас.
«Хин лини тоаеш бола болх чакхбаьннаб, хӏаьта хий хьахецара болх ший аргӏагӏа дӏахьоргба. Солнечни, Восточни, Заовражни оалача моттигашка хий хьалхагӏа хьадолалургда, хӏаьта Илдарха-Гӏалий тӏа сарахьа хьадоагӏаш хургда хий. Цкъа хьалхагӏа хин бешкаш хьалйиза яла еза, тӏаккха дӏа-хьа гӏоргда хий турбашка гӏолла.
Шахьара дас Дидиганаькъан Ахьмада машинаца дӏатӏакхахьа аьнна тӏадиллад наха хий. Хин машин хьаеха укх номерах телефон дӏатоха еза: 8 (873) 444-43-51», — дийцар тха газетага.
