ЖКХ оагӏонцара болх тоабеш ба Илдарха-Гӏалийтӏа
ЖКХ оагӏонцара декхар бахархоша ханнахьа дӏатергдолаш къахьегаш ба шахьаре. Хӏара кӏира рейдаш дӏаяхьа арабоал цу оагӏонцара болхлой. Тахан аргӏанара болх дӏахьош хилар уж Московски оалача ураме.
«Цхьаболча бахархоша иштта аттагӏа хеташ рейд дӏахьош барашка дӏателар тӏалатта декхар. Хӏаьта цхьаккха тайпара ахча дӏатела раьза боацарашца къаьстта къамаьл дир, из гӏулакх иштта чакхдаргдоацилга хьалхадоаккхаш. Рейд дӏахьош болча болхлошка гӏолла цу оагӏонца дувзаденнараш ма дарра тахка аьттув бар бахархой», - йоах «Сердалога» Илдарха-Гӏалийтӏарча администрацера кхаьчача хоамо.
Шахьара бахархошта хьалхадаьккхар, тока хьал тӏалатта декхар ханнахьа, боаггӏача боараме дӏателарга хьежжа хургдолга шахьаре. Тока моттигашкара балхаш кхоачашде, тишденна гӏирсаш хувца, моллагӏа хатар юстарадаккха аьттув хургболаш лоархӏаме да из гӏулакх. Дӏаьхача бетташка ахча дӏателаш боацаш, геттара дукха декхар хьаӏоадаь багӏараша халача доакх из хӏама.
