Илдарха-Гӏалан Градусова урам тӏара жагӀа билла никъ тоабир
17.03.2026 11:46
Илдарха-Гӏалий тӀа йистедаьлар Градусова урамах жагӀа билла никъ тоабеш хинна балхаш, яхаш, дийцар «Сердало» газетага шахьара мэре зарбан болх лелабеча Кхорахой Мурада.
Из никъ бохабаьбар, укхаза коммунальни балхаш деш. Из бахьан долаш, гӀашлоша, транспорта водителаша чӀоагӀа хало эзар, цу кӏоагаш даьннача наькъ тӀагӀолла дӀа-юха лелаш. Из хало хӀанз дӏаяьлар. Укх деношка, шахьара кулгалхочун гӀонча Жандиганаькъан Азраил мэре къахьегама даькъа викалашца вахар балхага хьажа.
Белгалду, хьатӀадоагӀача шера, «Вахара хьалаш» яхача къаман проектах Градусова урам тоабе лаьрхӀад, иштта асфальт булларгба Чапаева, Фрунзе урамашта юкъерча даькъ тӀа.
