Даьла духьа цӀий дӀачутеларах йола семинар дӀайихьар Магасе
15.05.2024 12:56
Дикача наьха клубо цӀий дӀачутеларах йола семинар дӀайихьар Магасе. «Хов, мог, гӀо дергда» яхача хьалхаленца дӀахьош хиннача кхетаче дакъа лоацаш хилар цӀий дӀачуийдеча станцера болхлой, иштта тайп-тайпарча моттигашкара къахьегамхой.
Из хоам «Сердалога» бир кагирхой политикахи туризмахи йолча министерстве.
«Дикача наьха клуба хьалхалаттарашцара къамаьл дӀадоладелар, цӀий дӀачутелача сага лораде дезараш дувцаш. Теркалдир, цӀий дӀачутеларах хул яхаш наьха кхетаме чӀоагӀденна латта бакъдоацараш. ЦӀий дӀачуийдеча станцера енача Хамхой Лидас белгалдир, цу гӀулакхо, дегӀа зе ца деш, пайда белга», - йоах тхогарча хоамо.
Кагирхоша дийцар, иштта цу оагӀонах йола кхетачеш республикерча дешара моттигашка дӀакхахьа еза, яхаш.
