Наркоманех хьадоалача зуламах дийцар Магасерча дешархошта
«Марем» яхача гимназе Халкъашта юкъерча наркоманена духьале лоаттаеча Ден хетаяь кхетаче дӏайихьар Магасерча администраце. Из хоам «Сердалога» бир мэре.
«Дешархошца къамаьл дӏахьош хиннараш бар дийша нах Ахкилганаькъан ӏаьла, Кхоартой Абукар, АТК секретарь Ильясанаькъан Руслан, АНК секретарь Опенаькъан Яха, ПДН комиссе секретарь Алхой Тамила, ПДН инспектор Пхьилекъонгий Хьава, кагирхой кхела кулгалхо Цӏокъанаькъан Лида», - йоах тхога бенача хоамо.
Гулбеннараша кагирхошта хьалхадаьккхар, наркомани яхача зуламо сага вахара доккха зе делга, цхьаккха тайпара цох хьокхавала йиш йоаца доккха во из долга. Наркотикашца бувзам лелаберашта доагӏаш долча таӏазарах дийцар кхетаче. Шоаш леладеча хӏаман уйла еш, бусалба динца харцахьа долчун никъ хоадабеш, моллагӏа тешаме доаца гӏулакх теркалдича ӏаьдала болхлошка хоам беш хилара тӏахьийхар дешархой.
Иштта йола кхетаченаш вай къонача тӏехьенца дӏакхахьар тахан лоархӏаме да, хӏана аьлча юххьанца денз; водар, дикадар къоастаде ховргдолаш; кхетам чӏоагӏбе беза цар.
