Курски тӏема юкъе Котало яккхара хетаяь кхетаче хилар Магасе
Россе тӏема сийлен Дийнахьа, Курски тӏема юкъе моастагӏа вохавеш лаьттараш дагалоацаш хиннача кхетаче дакъа лоацаш хилар Магасерча «Цаӏ йолча Россе» викалаш, мехкарча Vӏӏӏ-ча кхайкарала Халкъа Гуллама хоржамий кандидаташ. Шахьарерча мемориале зизаш доахкаш хилар уж, советски бӏухой дагалаьца.
«Магасерча Коталон Парке, «Массаза йоагача цӏера» мемориале хилар из кхетаче. Даггара чугӏерташ хинна бӏеха фашист вохавеш духьаллаьттача советски бӏухой исторех дийцар цига. 1943-ча шера маьцхали бетта 23-ча дийнахьа, «вайчаргахьа» котало йолаш, Курскера вохавир моастагӏа. Сийлахь-боккхача Даьймехка тӏема Коталонца чӏоагӏа лоархӏам болаш, немце Курскера вохавар, СССР лаьтташ цун карацакхачийтарца. Бӏехача фашиста юххьанца вӏашагӏъелла хинна операци, «парх», аьнна, йохаеш хилар из», - йоах «Сердалога» «Цаӏ йолча Россера» кхаьчача хоамо.
«Цаӏ йолча Россе» Магасерча оагӏон секретарь волча Дарсиганаькъан Хаваж-Бахьаудина, Халкъа Гуллама хоржамашка дакъа лоацаш волча кандидата Олиганаькъан Бадрудина белгалдир, из доккха истори вай къонача тӏехьен довзаш хилар лоархӏаме долга.
Даьй турпалал гойташ хинна никъ бовзаш, ураотта беза къонабараш! Советски бӏухоша моастагӏа вай лаьтташта доал ца оттийташ яьча духьаленах, тӏема истореца дукха да, вай кхоане маьрша хилийта гӏерташ деналца фашист вохаваь нах ба уж.
