Магасе ГӀалгӀайченна хетаяь маркаш тӀаийцар
ГӏалгӀай паччахьалкхен 100 шу дузаш хиларца, почтага гӀолла дагалоаттама белгалонаш тӀаийцар. Почта маркаш тӀа мухьар оттадир ГӏалгӀайчен кулгалхочо Келаматанаькъан Махьмуд-Ӏаьлас, РФ Президента СКФО гӀолла викала гӀонча волча Надыкто Владимира, иштта «Почта России» Къилбаседа Кавказа макромехка кулгалхочун гӀончас Плотников Александра.
«ГӏалгӀайчен бӀаь шу дизара белгало - из лоархӀаме исторически ди да. Цу тайпарча маркашта безам тӀагӀоргба уж гулъеш барий вай мехка а дерригача дунен тӀа а.
Уж открыткай, каьхатий цхьа дакъа хинна дӀаоттарах, цар дувцаргда дукхача наха республиках, царна гойтаргья укх дунен тӀара ший тайпара йолча лаьттан миӀинг.
Почта маркаш тӀа я вайна лоархӀаме йола гӀишлош, иштта къаман белгалонаш. СССРа ханашка вай дукха сатийсар таханара ха хьакхачарга», - аьлар мехка кулгалхочо, ше уж почта белгалонаш тӀаэцачача къамаьл деш.
ГӏалгӀай Республикан Кулгалхочун, Паччахьалкхен зарбан болх лелабераша хоам бир, цу гӀулакха лаьрххӀа дола почта мухьар кийчдаьдар, цу тӀа да уж чӀоагӀъеш долча ден таьрахь. Почта маркаш арахийцар 17 эзар, цар юкъара мах 100 сом да.
Республикан лоархӀамегӀа йола моттигаш я цар тӀа, масала, ГӏалгӀайчен герб, Барта гӏала, Вӏовнашке ягӀа гӀалаш, дӀадахача бӀаьшерашкара кераста наха текъа даь Тхьаба-Ерд, «Ӏарамхи» яха курорт, иштта кхы дуккхадараш.
