Доазув лорадерий къонача новкъосташта лаьрхӏа, «Зарница» яха ловзар дӏадихьар Магасе
Вай мехкарча Россе кхерамзлен гӏулакхех болча Федеральни Погранични оагӏон болхлоша «Зарниц» яха тӏема-денала ловзар дӏадихьар Магасерча № 1 йолча ишколе-берий беша. «Паччахьалкхен кагирхой политикага гӏолла дӏахьош болх ба из тахан. Унахцӏенон вахар хьаллоацаш, Даьхенцара безам, лерхӏам чӏоагӏбеш хургболаш дӏахьош ба из болх. Кхо тоаба яр ше-ше котъяла гӏерташ къовсаеннараш», - йоах тахан тхога цу моттигера бенача хоамо.
Автораша оттадаьчох, шоай кхетама, кийчон хьал, тоабанца болх бе хар хьагойта дезаш дар бераш. Даьхенцарча безамах дола илли оалаш дӏаболабелар къонабараш, дӏахо тӏема декхарашца дувзаденнараш шоашта мел дика довз хьахьокха дезаш бар уж.
«Санитарни ха» яхача оагӏонца, лозаваьча сага эггара хьалхара гӏо дар мишта хила деза хьахьекхар бераша, хӏаьта спорта оагӏонца шоай дегӏа низ, кадай хилар гойтар.
«Тӏема доазув» яхача оагӏонца «тактически» декхараш кхоачашде хьежар къонабараш, шоай беррига низ ураоттабаь. Эггара толашагӏа барашта дипломаш, кубкаш луш; дӏакъаьстар из гӏулакх.
