Магасе дӏайихьар «Россе низ» яхача марафона чуйоагӏа футбола яхь
Магас шахьаре, Пхьарчанаькъан М. цӏерагӏча стадионе, ондаргий футбола яхьаш дӏайихьар, «Россе низ» яхача спортивни марафона чуйоагӏаш. Уж хетаяь яр безама, тешама Ди хилара. Кхетаче дӏахьош яр дезала спорта кӏира долаш, цо вӏашагӏтехар мехка миӏингашкара бахархой, унахцӏена вахар дӏадахьоча наькъ тӏа, яхаш, дийцар «Сердало» газетага «Цаӏ йола Росси» яхача парте Гӏалгӏай даькъо.
Цига дакъа лоацаш яр ондаргий футбола тоабаш, цар гойтар шоаш лакха кийчо яь хилар, спортивни оамал, коталонга кхачара тӏакхувш хилар. Цига беза хьаьший бар Магас шахьара «Цаӏ йолча Россе» моттигерча даькъа секретарь Дарсиганаькъан Хаваж-Бахьаудин, шахьара кхела депутаташ-единороссаш, иштта парти хьаллоацараш. Цар моаршал хаьттар яхьашка дакъа лоацача спортсменашка; иштта белгалдир, кагирхой, бераш дукхагӏа спорта юкъедалар унахцӏена кхоане хилар долга», - аьлар тхога хоам баьчо.
Ерригроссийски спортивни «Россе низ» яха марафон кхоачашъеш я, «Цаӏ йолча Россе» парте хьаллоацаш, из лаьрхӏа я физически культура дегӏайоалаяра, унахцӏена вахар леладара. Цу марафона чуйоагӏаш берригача мехка гӏолла дӏахьош я яхьаш, говзанча хьехамаш, спортивни цӏайш.
«Россе низ» яхача проекто вӏашагӏтох миллионаш нах, Калининградагара Владивостокага кхаччалца. Марафона керттера белгало - из массанега кхоачаш хилар. Еррига кхетаченаш дӏахьош я мах боацаш, цига дакъа лаца йиш йолаш ва моллагӏа.
