Республикан мехктохкама музея лаьрхӏа, керда гӏишло хьалъеш боахк Магасе
Малсаганаькъан Тухана цӏерах йолча Гӏалгӏай паччахьалкхен музея лаьрхӏа керда гӏишло хьалъеш боахк тахан Магасерча 17-ча зӏамигача кхален доазон тӏа. Юххьанца къоастаяьча ханал хьалхабоалаш, болх дӏахьош ба тахан къахьегамхой. 1 миллиард сом совгӏа ахча да цу проекто дӏалаьцар.
7, 4 эзар кв.метрага кхоачаш да гӏишло хьалъеш дола доазув. Кердача музее гойтама залаш, ганз лораераш, цхьацца балхаш дӏахьош йола пхьоаллеш, библиотека, 220 сага моттигаш луш йола конференц-зал, иштта кхыйола моттигаш хургья. 500 гаргга адам цкъа тӏаэца йиш йолаш хургья музей. Тахан музея ганзашка 15 эзар совгӏа хӏама я лораеш, бакъда моттиг цатаарах еррига хӏамаш ӏооттае аьттув бац. Хӏаьта кердача музее паргӏатта моттиг, эшаш мел дола хӏама хургда. «Сердалога» из хоам бера мехкарча Паччахьалкхера.
Кӏалхара кӏийле кийчъеш бола болх тахан 20%-га кхоачаш чакхбаьннаб. 2028-ча шера оагӏой бетта кийча хила езаш я гӏишло, юххьанца дийцачох. Музея кхоачама хьал а хӏара денна тоалуш латт ала деза тахан. Исторически лоархӏам бола дукха хӏамаш я тӏехьарча хана музее хьачуенна. Археологически оагӏонцара 260 хӏама я цига хьакхаьча. Жӏайрахьа кхалерча Лаьлагӏе яхача гӏалай юрта болх дӏахьош кораяь хӏамаш я уж.
