МагӀалбике цхьаькха моттига куц тоадеш ба
03.09.2024 12:16
Шейх Мансура цӀерах бола МагӀалбикера урам хоза тоабир болхлоша. Шахьара моттигий куц тоадарах йолча къаман проектага гӀолла болх дӀабихьар цига.
«Бахархой дог гӀоздоаккхаш, асфальт билла, тротуараш тоадаь, сийрда лампаш егӀа, куц тоадаьд урама. Белгалде деза, бахархой шоаш оарцагӀбаьнна, дукха ха йоацаш, 900 метрага кхоачаш, бӀеха хиш дӀауха турбаш цига чуяьхкалга», - дийцар «Сердало» газетага шахьара администраце.
ДӀахо тоае еза моттигаш - Панфилова, Покрышкина цӀераш лелаю урамаш. Укх шера чакхбаккха безаш ба из болх. Шахьара куц тоадара тӀехьа кхелла проект йоаржаеш дикка къахьега лаьрхӀа ба администраце кулгалхой.
