Магӏалбике СВО доакъашхой берашта коачамах диза дешархой тӏормигаш дӏадийкъар
Маьцхали беттацара тӏехьара денош, бераш кердача дешара шерга кийчдеш йола ха я. СВО доакъашхой берий дегаш хьаста лаьрхӏар Магӏалбике.
«Ишколе даха кийчде бер» яха болам дӏахьош хилар цига, вай мехкадас Келаматанаькъан Махьмуд-Ӏаьлас тӏадилла. Тетрадаш, ручкаш, къоаламаш, иштта кхыйола эшаш мел йола хӏамаш чуйоахка тӏормигаш дӏадийкъар; СВО доакъашхой берашта юкъе. Дешара шерцара хьалхара ди бераша дог делаш, гӏоздаьнна долаш тӏаэцаргдолаш, къахьегаш ба мехка.
«Тахан гӏо эшаш болча наьха оагӏув хьаллацар, дега йӏовхал екъар да из эггара хьалха. Бер ишколе дода ха хьатӏаэттача дай, ноаной кхоачашде дезараш дукха хул, вайна хов бера тахан дукха эшилга, цунга хьежжа лоархӏам болаш да из гӏулакх. Эшаш мел болча кхоачамах биза болча тӏормиго бера дега тоам бергба», - дийцар «Сердалога» Магӏалбикерча администраце.
Кӏира совгӏа ха мара йисаяц массайолча ишколашка дешара шерцара хьалхара гургал тоха. Аьттув болаш, дукха толамаш доахаш, кердача, беркатеча наькъ тӏа гӏа боаккхаш хилда керда дешара шу вай берашта! Царех доаккхал де йиш йолаш хилда вай!
