Магӏалбикера цӏихеза берий беш тоаеш боахк болхлой
Укх бетта 1-ча дийнахьа денз, дикка кулг тохаш тоаергйолаш, дӏакъайла латт Магӏалбикера «Бӏенилг» яха №2 йола берий беш. Берий бешамаш, ишколаш тоаярах йолча программага гӏолла дӏахьош ба из болх. «Сердалога» из хоам бир шахьара мэре.
«Карарча хана болх хьинаре дӏахьош латт. Къаьнарча, воча хьале эттача корашта, наӏарашта меттел дикагӏа дола кораш, наӏараш оттадеш боахк тахан. Дӏахо, пенаш шаьрде, иштта кхыдола чура балхаш де дӏаболалургба уж. Кхоачашде дезараш дукха да, дале а, тахан дӏатӏахьежача а теркалде йиш я тоаяь яьлча берий беш мел хоза, бӏарг тӏаотташ хургья», - йоах тхога кхаьчача хоамо. Сийрда, боаггӏача боараме тоаяь латта чура моттигаш, деррига теркалдеш хоза кулг теха куц эргадаьккха ков зӏамигача хьаьший, берий беша къахьегарий дега тоам беш хургда.
Берашта лаьрхӏа йола моттигаш цхьаккха кхоачамбоацараш доацаш лертӏа хилар чӏоагӏа лоархӏаме да тахан, цунга хьежжа массайолча юрташкара, шахьарашкара бераш чуӏеш йола моттигаш тоаеш къахьегаш ба мехка.
