Цу юкъа укхаза кашамаш мел да гобаьккха 1200 метр йӀаьха карт яьй, чура доазув тоадаьд салаӀара цӀалгаш а оттадаь, коа чувоаллача керда коанаӀараш егӀай.

«Цул совгӀа, вахаре эшаш дола керда гӀирсаш ийца, уж чулеладара йола керда ченаш хьалъяьй. Чура асфальт Ӏобиллаб. Из ба 300 метр. Керда сердал лургйолаш бӀоагӀий ӀодегӀад. Кашамашта гонахьара доазув баьццара дерзадаьд. Керттердар да, моттигерча ди лелабеча наьха дехарах, шахьара администраце ялх гектарагара 10 гектарага кхаччалца, кашамий доазув шердаь хилар»,-аьлар тхога хоам баьчо.

«Сафмар» фонда кулгалхочо яхачох, байна нах дӀабехка боахка моттиг тоаяр, цига саг дӀаволлара эшаш дола хьал лоаттадар, юкъарча культуранца хиланза даргдоаца цхьа дакъа да. Из бахьан долаш, байнарий сий деш долча къаман нах дӀабехка боахка кашамаш тӀехдика лостам болаш хила деза.