Магӏалбике дийцар БАРСаца контракт чӏоагӏъяра дешаш
Магӏалбик-Шахьара администраце кхетаче дӏайихьар. Цига дакъа лоацаш бар администраце болхлой, цунна чудоагӏача доакъой викалаш. Цига дийца дош дар БАРС яхача лоӏамеча мугӏарашка оттара нах вӏашагӏтохар, иштта нахаца контракт чӏоагӏъеш бола болх дӏабахьар.
Магӏалбик шахьара администраце зарбан болх лелабераша Сердало» газетага ма аллара, кхетаче йолаш къоастадир контракт чӏоагӏъяра керттера хьалаш. Къаьстта терко тӏаяхийтар паччахьалкхен оагӏорахьара цу мугӏарашка отташ болча наха лоаттадеча новкъостала, цу юкъе дийцар цу тоабан доакъашхошта, цар дезалашта ахча луш хилар, вахара таронаш, оаттонаш хилар.
Кхетачен чаккхе еш, цу балха бехктокхаме болча викалашта, кулгалхошта тӏадиллар цу даькъ тӏара болх дикагӏа вӏашагӏболлар, из дӏабахьар. Кастлуш Магӏалбике дӏахьоргба, БАРС амал деча мугӏарашка оттара бахархой тӏахьехаш бола болх, царна йовзийтаргья цу даькъ тӏара таронаш.
