Магӏалбикерча Орцханаькъан цӏерах болча урама хьал тоадеш боахк болхлой
Магӏалбикерча Орцханаькъан цӏерах болча урама хьал меттадоаладеш, болх дӏаболабаьб къахьегамхоша. Кӏалхара тиша никъ бохабаь хьалъийца, керда асфальт ӏобулларгболаш кӏийле тоаеш, жагӏа тоссаш, нийсъеш боахк уж. 205 метрага кхоачаш дӏоахал долча цу доазон тӏа 5,5 метр шера асфальт улларгба кастта.
«Керттера никъ тоабарал совгӏа, гӏаш леларашта паргӏато хургйолаш, къахьегаш ба цига. Таханарча ханага хьежжа бола гӏашлой никъ биллаб цу моттиге, иштта ток кӏезигагӏа йоаеш йола лампаш йогӏа лерхӏ», - дийцар «Сердалога» Магӏалбикерча администраце болхлоша.
РФ Президента Путин Владимира чӏоагӏонца йоаржаеш йолча вахарера моттигаш тоаеча къаман проектага гӏолла дӏахьош хувцамаш да уж. Хӏара денна тоаеш латт шахьара моттигаш, дикка паргӏатагӏа, кхераме доацаш хургда урамаш а.
