Мержой Салама сийна Турпала Парта хьайийллар МагӀалбике
ТӀема операцен юкъе вахар хаьдача майрача бӀухочун, Мержой Салама цӀерах Турпала Парта хьаеллаш кхетаче хилар, МагӀалбикерча № 6 йолча ишколе.
Цига дакъа лоацаш вар «ЦаӀ йола Росси» яхача парте моттигерча оагӀон секретарь вола Йовлой Ӏусман. Дешархошта дийцар, вай мехкахо Мержой Салам мел денал долаш, яхь, сий лорадеш, ший декхараш кхоачашдеш лаьттав.
МоастагӀашта духьала нийсвелча, лакха майрал гойташ, цар кхоъ тӀема машин, кхыдола гӀирсаш дохадаь дӀадахийтар цо. Цул совгӀа, моастагӀа дехьа ца воалийташ, цун никъ бийхка лаьттар из, шийна тӀехьара Россе эскар лорадеш. Ший декхараш цо тӀехдика кхоачашдарах, моастагӀа дикка вохаве аьттув баьлар Россе эскара бӀухой.
2022-ча шера, бӀаьстан тӀехьарча бетта 11-ча дийнахьа, вахар хаьдар вай мехкахочун, Даьхе лораеш латташ. Вай дегашта цӀаккха а бицбала йиш яц; къаман майра, сийдола, эздий къонгаш!
