Магӏалбикера Чахкенаькъан Саӏида цӏерагӏа гимнази цӏенхаштта тоае йолайир
Магӏалбикера 320 совгӏа бер деша дагӏача №1 йолча Чахкенаькъан Саӏида цӏерагӏча гимнази цӏенхаштта тоае йолайир. Балхаш дӏахьош да, «Кагирхойи бераши» яхача къаман проекта чудоагӏаш. Хӏанз укх сахьате, болхлой инженерни балхаш деш ба. Дӏахо цар дӏаболабергба коммуникацеш хувцаш, тхов туллаш, тӏера кеп кердайоаккхаш, цхьацца йола чура моттигаш тоаеш бола болх. Гимназе гӏишло кердаяккхарах, таро хургья цига дешаш долча берашта вай заман дика хьалаш хьакхолла.
«Ишколашкара хьал кердадаккхара йола таронаш хилар, Россе Президента Путин Владимира къаман проекташ хьаллоацаш хиларах. Из бахьан долаш моттигашта лоархӏаме новкъостал лоаттаду, дешара даькъ тӏара хьал тоадеш»,- аьлар Гӏалгӏайчен кулгалхочо Келаматанаькъан Махьмуд-Ӏаьлас.
Ер шу белгалон шу хургда мехка дешара даькъ тӏа. Къаман проекташ кхоачашъяра чудоагӏаш, лоархӏамеча ялх моттиге тоадара балхаш де лаьрхӏад.
Магӏалбика гимнази йоацаш, кхы а йиъ берий беш, цаӏ юкъера дешара ишкол тоаергья. Таханарча дийнахьа балхаш массайолча оагӏорахьа дӏадоладаьд.
Деррига чулоацаш болх дӏахьош хиларах, вай кхувш йоагӏача тӏехьенна лерттӏа дешара хьалаш хьакхолла, кхерамзлен ӏалашо е таро хул.
