Журналиста Кхоартой Мурада хетаяь жӀакех яхь хилар МагӀалбике
Массанена вовзаш хиннача йоазонхочоа, журналиста Кхоартой Мурада хетаяь жӀакех йола яхь хилар МагӀалбике. Мурада кхоллам лоархӀача, жӀакашцара безам лакха болча бахархошта доккха совгӀат хилар цу гӀулакхах.
«Республикера эггара дикагӀа бола шахматисташ гулбелар цига. ХӀара шера дӀакхухьаш я из яхь вай мехка. Лакха начӀал хинна журналист, йоазонхо дагалаьцар цу кхетаче»,- дийцар «Сердалога» шахьарерча администрацена кулгал деча Галай Мусас.
ХӀаравар лакха говзал гойта гӀерташ дӀаяхар яхь. Котало яьккхар Осменаькъан М-Б., Оздой М., Дзовранаькъан М-С. СовгӀаташ, ахча денна белгалбир котбаьннараш. Яхь вӀашагӀъеллача «МагӀалбикера хоамаш» яхача газета керттера редактор волча Кхоартой Ахьмада баркал аьлар дакъа лоацаш хиннарашта, иштта из гӀулакх дӀадахьа гӀо даьча «Къона патриот» яхача оагӀонна кулгал деча Бохтаранаькъан Мадинайна.
Теркалде деза, Кхоартой Мурада «Сердало» газета редакце керттерча редактора гӀонча волаш, корреспондент волаш, дуккхача шерашка хьинаре къахьийгалга.
