Футболах йола яхь дӀайихьар МагӀалбике
04.09.2025 09:34
Кагирхошта юкъера футболах йола яхь дӀайихьар, МагӀалбикерча Орджоникидзе Серго цӀерах йолча стадионе. Терроризма духьале лоаттаяра Ден хетаяьча цо хьахьекхар, спорто адам машаре, бартаца хилара тӀахьехилга.
«Наха юкъе дикаш доаржадеш; воча, зуламе долча хӀаман наькъаш тедаш, беркатеча хӀаманна адам тӀахьехаш, вахар мел лоархӀаме да хьагойташ яр яхь. Вай дерригаш цу хӀаман тӀехьа долаш дӀадаха деза, тӀаккха харцо котъяргьяц», - дийцар «Сердалога» шахьара администраце.
Ше-ше хьалхавала гӀерташ, ловзаш бар футболисташ. Белгалде деза, спорт кхувш латтача къонабарашта юкъе, къаьстта тахан, геттара чӀоагӀа йоаржаяр лоархӀаме, пайда беш долга.
