Тахан МагӀалбике «Мехка сагӀа» яха болам дӀахо дӀахьош бар
ГӏалгӀайчен кулгалхочо Келаматанаькъан Махьмуд-Ӏаьлас могабаь дӀахьош болча «Мехка сагӀа» яхача болама чудоагӀаш, тахан МагӀалбике кхачана даараш декъаш бар таро йоацача дезалашта, Мархаш хьатӀадоагӀаш.
«Кхачан даараш делар дукха дезал болча фусамашта, СВО доакъашхой дезалашта, иштта хала бохкача наха. Хӏара тӀормиг биза бар хьалхарча аргӀагӏа эшаш йолча даарех - дулхах, хьоарах, шекарах, дугах, генарий даьттах, иштта кхыбола кхачах.
СагӀа дӀадекъаш дика новкъостал дир администраце болхлоша, иштта волонтёраша, из цар дӏакхачийтар къаьстта уж нах бахача фусамашка», - аьлар «Сердало» газетага шахьара администраце зарбан болх лелабераша.
«Мехка сагӀа» яха болам дӀабахьар Ӏадат хинна дӀаэттад тахан вай республике. Респуликан Кулгалхочо белгалдир, цу дезача деношка цхьа дезал терко йоацаш бита йиш йоацилга. Из сагӀа таро йоацача, вахаре новкъостал эшача наха дӏакхачийтар лоархӀаме долга.
МагӀалбика бахархоша баркал аьлар шоашта терко ярах, дика новкъостал да езача хана наха деш дар.
