Магӏалбике хьалъеш латт, йиъ гIат йола искусствай ишкол
Гӏалгӏай мехка кердайоахаш я культуран гIишлош, иштта кагирхошта кхоллама болх дӏабахьара хьалаш хьакхоллаш да. Хӏанз хьалъеш латт Магӏалбике искусствай ишкол. Из болх дӏахьош ба «Дезалера мах бараш, культуран хьал» яхача мехка проекта чубоагӏаш. Из къаман проект дӏайолаяьй Путин Владимира могаеш хиларах, хӏаьта из иштта хьаллоац «Цаӏ йолча Россе» парте программо.
«Тха декхар да бераш дика дегӏадахкара, цар таронаш шерагӏа йовзара дола хьалаш хьакхоллар. Республике дукха начӏал дола бераш да, уж хьаллаца деза, цар кхоллам боаржабеш. Культуран урхаллене 600 совгӏа ашарий гӏирсаш да, из чӏоагӏа лоархӏаме да бераш ӏомадара, хӏаьта хьехархошта - кхоллама даькъ тӏара таронаш дегӏайоалаяра.
Шоллагӏа боаккхаш бола гӏа - укх заман хьалаш хьакхоллар. Магӏалбике, дукхача хана денз, из таро хиннаяц, цудухьа хӏанз из гӏишло хьалъеш хиларо искусствай ишкол кердача боарам тӏа йоаккхаргья. Лоархӏаме да вай берашта эшаш дола хьалаш лоаттадар, цар дешар лакхача боарам тӏа даккхар. Къаьстта цу тайпарча проекташа таро лу культуран ӏадаташ лораде», - аьлар Гӏалгӏайчен Кулгалхочо Келматанаькъан Махьмуд-ӏаьлас.
Хӏанз Магӏалбикерча искусствай ишколе дешаш да 399 бер. Царех 140 саг ашарий гӏирсаш дIалакха ӏомалуш ва, хӏаьта 250 бер халхараш ӏомадеш да.
Къонача начӏалашта хьалъергья диазза вӏаштIаръяь 3 эзар квадратни метр йола гӏишло. Хӏанз цига болх дӏахьош ба, из йистебаргба 2027 шера.
