Магӏалбике хьалъеш я кердача психоневрологически интерната гӏишло
Магӏалбике хьалъеш я 200 моттиг чуйола психоневрологически интернат. Гӏалгӏайчен вахара даькъ тӏара укх заман хаттараш кхоачашдара эшаш я из. Паччахьалкхен терко эшаш болча наха дола лорий хьал лоаттадара, царна дика хьалаш хьакхоллара лаьрхӏа я из.
«Цо дӏалоац 13,8 эзар кв. метр. Цу чу хургда бийсан ӏохувшар, вахара, иштта административни ченаш. Цул совгӏа проекта чуйоагӏаш я столови, хий кхорза, барзкъа дутта моттигаш. Хӏанзара, Дола-Коара психоневрологически цӏа-интернат лаьрхӏадая 70 моттига, хӏаьта аргӏагӏа дӏаязваь латт вахара хьалаш тоадар эшаш вола 127 саг. Керда гӏишло хьалъяро таро лургья республикан социальни гӏулакх дара хьалаш, таронаш тоае»,- аьлар «Сердало» газетага республикан паччахьалкхене.
Карарча хана говзанчаш шоай болх дӏахьош ба, иштта йистедаьхад административни болхлошта лаьрхӏа йолча фусамашкара чура балхаш. Цунца цхьана дӏахьош ба чура коммуникацеш, мух кхетийташ дола гӏирсаш вӏашагӏдохкаш болх. Лаьрххӏа из комплекс хьаелларгья 2028 шера.
