«Севастополера Санкт-Петербургбе» кхаччалца болхараш тӀаийцар вай республике
«Севастополера Санкт-Петербурге» кхаччалца никъ беш болхараш, тӀаийцар тахан МагӀалбике. «Мишта кхаьчар Котало» яхача ерригача Россе исторически проекта юкъе чудодаш гӀулакх да из. 8 турпала шахьарах, 22 тӀема сийлен шахьарах чакхбаьнна бода из никъ. Севастополера дӀаболабенна, хьатӀабоагӀача бетта 10-ча дийнахьа Санкт-Петербурге сацар хургда цу бӀаьхача наькъа. ТӀема сийлен моттигашка гӀолла чакхбаргба проекта доакъашхой.
ТӀема истори дагалоаттадара тӀехьа дӀахьош гӀулакх да из вай мехка. «Вай котало бахьан» яхача хьалхаленца дӀайолайир проект. РФ тӀахьожамца гӀа боаккхаш, бахархой вӀашкаозаш, Котало йоаккхаш тхьовра лаьттараш, тахан тӀема операцен юкъе дакъа лоацаш вай мохк лорабеш латтараш дагалоацаш дӀахьош проект я из», - аьлар «Сердалога» республикерча ХӀарман палатан доакъашхо волча ГӀаьнтамаранаькъан ЯрагӀе.
Паркерча тӀема сийлен мемориала юхе дӀадахар, бӀаьха никъ бахьаш боагӀарашцара вӀашагӀкхетар. Гулбеннача дешархошка, цӀеэскархошка, бахархошка йистхилар спорте гӀаш леларца РФ оагӀон доакъашхо, дунен рекордсмен, Россе цӀихеза вола Логинов Станислав.
ТӀема шерашка фашиста дагаяьлла мехкдаьттан шахьар дӀа ца кхоачийташ, моастагӀа цигара вохавеш лира тӀом беш лаьттараш дагалаьцар цига, царна оттадаьча сийленга тӀа зизаш даьхкар.
